“Të mërkurën VKM në Kuvend”, Lame: Ka pasur abuzime me pronat shtetërore

Drejtori i Përgjithshëm i Kadastrës, Artan Lame është shprehur se pasi kanë bërë regjistrimin e pronave private tashmë do të fokusohen të pronat shtetërore tek të cilat sipas tij ka pasur abuzime.

Në një dalje për mediat, ai bëri me dije se prona shtetërore është dëmtuar ndër vite ndërsa shtoi se ky abuzim ka ndodhur për shkak se kjo pronë nuk ka qenë e regjistruar.

Ai tha ndër të tjera se nga 260 mijë prona shtetërore në Shqipëri, 115 mijë prej tyre janë transferuar institucioneve qendrore ndërsa vetëm 20 mijë të regjistruara në Kadastër.

Lame theksoi se të mërkurën në Kuvend do të kalojë një VKM për përditësimin e pronave publike.

“Pasi kemi regjistruar pronat e qytetarëve, jemi fokusuar te pronat shtetërore. Jemi koshient të gjithë se çfarë ka ndodhur me pronën shtetërore.

Prona shtetërore është dëmtuar ndër vite. Rastet e abuzimit janë të pafundme. Ky abuzim ka  nisur për shkak të mos regjistrimit të pronës shtetërore. Kryesisht është abuzuar me pronën shtetërore që ka pasur shumë hapje në territor.

Duke qenë prona të paregjistruara qoftë Komisioni i Kthimit të Pronave qoftë Gjykatat, kërkonin informacion te IZRPP, kjo thoshte skam asgjë të regjistruar dhe këto komisione apo Gjykata vazhdonin të vepronin në terren duke thënë se kjo nuk ka pronë të regjistruar dh mund të vazhdohet me privatizimin e tyre.

Nga viti 2020 deri më sot kemi arritur të identifikojmë rreth 260 mijë prona shtetërore në Shqipëri.  Prej këtyre rreth 115 mijë prona, janë transferuar institucioneve qendrore dhe vendore. Vetëm 20 mijë janë të regjistruara në Kadastër. Të mërkurën në qeveri do të kalojë një VKM për përditësimin e pronave publike. Kjo VKM do të saktësojë procedurën se si do të identifikohen këto prona. Do të krijohet regjistri për regjistrimin e pronës shtetërore”- tha ai.

LEXONI GJITHASHTU: 

• Begaj mbledh sot Këshillin e Sigurisë Kombëtare, në fokus prioritetet për vitin 2023
• Lëvizje në Policinë e Shtetit, emërohen shefat e rinj në disa komisariate