”Të ndëshkojmë Kinën”- Deklarata e fortë e Stoltenberg dhe raporti NATO – Pekin

Shefi i NATO-s, Jens Stoltenberg ka deklaruar se Kina duhet të përballet me pasoja për mbështetjen e luftës së Rusisë në Ukrainë, nëse nuk ndryshon kurs.

Në një intervistë për BBC, Stoltenberg tha se Pekini po përpiqet të luajë i ulur në dy karrige, duke mbështetur përpjekjet luftarake të Rusisë nga njëra anë dhe duke ruajtur marrëdhëniet me aleatët evropianë nga ana tjetër.

“Kjo nuk mund të vazhdojë më tej”, theksoi sekretari i përgjithshëm i Aleancës gjatë një vizite në Uashington.

Ai bëri me dije se në nivel evropian po zhvillohen bisedime për sanksione të mundshme ndaj gjigantit aziatik.

“Kina po i ofron teknologji, kryesisht pajisje mikro-elektronike, Rusisë, të cilat përdoren për të prodhuar raketa dhe armatime për të sulmuar Ukrainën”, tha Stoltenberg.

“Në një moment të caktuar, ne duhet të shqyrtojmë përballjen me pasoja ekonomike nëse Kina nuk ndryshon qasjen e saj”, nënvizoi sekretari i përgjithshëm.

Pekini është aktualisht i sanksionuar për mbështetjen që i jep Moskës. Muajin e kaluar, Shtetet e Bashkuara njoftuan kufizime për rreth 20 kompani kineze, me bazë në Kinë dhe Hong Kong.

Nga ana e tij, gjiganti aziatik është mbrojtur duke thënë se nuk po i shet Moskës armë vdekjeprurëse dhe se me kujdes po menaxhon eksportin e artikujve teknologjikë, në bazë të ligjeve dhe rregullave ndërkombëtare.

LEXONI GJITHASHTU:

• Deklarata e Stoltenberg për armët bërthamore, reagon Kremlini
• Stoltenberg: Hungaria nuk do ta bllokojë ndihmën e NATO-s për Ukrainën