Të rinjtë interes për t’u vaksinuar, të moshuarit në radhë për dozën e tretë

Kanë pritur deri tani, por për shumë arsye kanë vendosur të vaksinohen.

“Po bëj dozën e parë, Pfizer. Kam pritur kaq gjatë sepse nuk doja ta bëja, por tani po shoh që është shtuar numri i të infektuarave dhe po e bëj për të qenë më e sigurt dhe për familjen time”, u shpreh një vajzë.

Të tjerë kanë vendosur të vaksinohen sepse nuk u lejohet të udhëtojnë jashtë vendit.

“Po bëj dozën e parë. Më parë nuk më është dashur ta bëj, tani më duhet ta bëj sepse do të udhëtoj jashtë”, tha një tjetër qytetare.

Shefja e Shërbimit Parësor, Ariela Malaj na shpjegon se kryesisht janë të rinjtë, të cilët po interesohen më shumë për t’u vaksinuar.

“Është rritur interesi prej më shumë se 1 muaji, sidomos tek të rinjtë që po bëjnë dozën e parë. Edhe doza e tretë është pritur shumë mirë, interesimi është shumë i lartë”, u shpreh ajo.

Ndërkohë nuk mungojnë edhe ata që po bëjnë dozën e tretë, kryesisht të moshuar.

“Tani është e treta se dy të parat i kam bërë në Kanada”, tha një qytetare.

Prej datës 1 nëntor ka nisur edhe aplikimi i vaksinës tek fëmijët mbi 12-vjeç, kryesisht ata me sëmundje kronike, por nga autoritetet shëndetësore nuk është vënë asnjë e dhënë sesa është numri i këtyre fëmijëve.

LEXONI GJITHASHTU:

• Vaksinimi ka ulur me 50% vdekjet nga COVID, thotë mjeku Gjata