“Zërat e kujtesës” titullohet ekspozita me punë të nxënësve të shkollës “Jan Kukuzeli” në Durrës, që sjell përmes pikturave, instalacioneve a skulpturave, dëshmi të personave që kanë vuajtur gjatë periudhës së komunizmit.

Përmes krijimeve të të rinjve, kjo ekspozitë shpalos jetën në diktaturë ndërsa emrin e merr nga një kolanë e botuar nga Instituti për studimin e krimeve dhe Pasojave të komunizmit.

Pasqyra e heshtur, enët bosh qëndrojnë përkrah veprave në pikturë, tekstil, vizatim, grafikë që denoncojnë “fasadat e lumturisë”, radhën për ushqim, hijet njerëzore dhe dyert e dhimbjes si porta që u mbyllën përgjithnjë.

“Projekt i veçantë i ISKK që ka të bëjë me komunikimin me brezin e ri, pjesë e misionit tonë për zbardhjen e së shkuarës në një formë alternative”, tha drejtori i ISKK Çelo Hoxha.

“Arritën të depërtojnë në histori kaq të ndjeshme e t’i kthejnë në ngjyra, formë e fjalë, të krijojnë empati në historitë e së kaluarës. Janë parë në 360 gradë sepse donim të kishte larmi dhe veprat të ndërtoheshin në një koncept”, u shpreh Franc Priska, profesor pikture dhe kurator.

Një mozaik historish, të cilat rrëfehen bashkë e që sjellin para syve tanë vuajtjet e jetuara gjatë komunizmit erdhën pranë piramidës përmes 30 punimeve të 20 nxënësve. Ekspozita do të qëndrojë e hapur për dy ditë.

LEXONI GJITHASHTU:

• Hapet në Prishtinë ekspozita me lodrat e fëmijëve të luftës
• Hapet në Prishtinë ekspozita për persekutimin komunist të hartuesve të alfabetit