Të shtëna me armë gjahu në Durrës pas sherrit! Policia arreston dy të rinj

Një konflikt për motive të dobëta ndodhi pasditen e së mërkurës në lagjen nr. 15. në Durrës. Policia njofton se ka vënë në pranga një 29-vjeçar që gjatë konfliktit, qëlloi me armë gjahu në ajër ndërsa ka sekuestruar këtë armë e cila posedohej pa leje.

Po ashtu është vënë në pranga dhe një 26-vjeçar ndërsa është shpallur në kërkim kushëriri i tij, sepse gjatë këtij konflikti, goditën me sende të forta 29-vjeçarin.

“U arrestuan në flagrancë shtetasit K. D., 29 vjeç dhe P. P., 26 vjeç, të dy banues në Durrës. Gjithashtu, u shpall në kërkim kushëriri i shtetasit P. P., shtetasi D. P., 35 vjeç, banues në Durrës pasi shtetasi P. P. dhe D. P., dyshohet se për motive të dobëta, kanë goditur me sende të forta, 29-vjeçarin, në lokalin që administronte shtetasi P. P.. Më pas dyshohet se duke qenë në gjendje të dehur, 29-vjeçari K. D. ka shkuar në banesën e tij, ku mbante pa leje, një armë gjahu, me të cilën ka qëlluar në ajër”, thuhet në njoftimin e policisë.

Materialet procedurale i kaluan Prokurorisë së Durërsit, për veprime të mëtejshme.

LEXONI GJITHASHTU:

• Të shtëna me armë zjarri në Durrës, detajet e para
• Durrës, mbi 1600 gjoba dhe 8 të arrestuar gjatë dhjetorit nga “Rrugorja”