Të shtënat në Drenas, kryeprokurori Gashi: Ngjarja nuk lidhet me procesin zgjedhor

Të shtëna me armë zjarri janë regjistrua këtë të dielë në Komoran të Drenasit. Lidhur me ngjarjen ka dhënë detaje të reja kryeprokurori i Prishtinës, Zejnullah Gashi. Gashi bëri me dije se ngjarja s’ka lidhje me procesin zgjedhor. Sipas tij të shtënat kanë ndodhur për një konflikt të mëparshëm.

“Arsyet e konfliktit nuk dihen në detaje, mirëpo sipas informatave të para që i kemi kjo lidhet me një mosmarrëveshje të hershme, të para tre javësh. Tre personat e dyshuar janë të përfshirë në grabitje dhe vepra tjera dhe nuk lidhet me procesin zgjedhor”, tha Gashi.

Kryeprokurori tha se deri tani asnjë person nuk është ndaluar lidhur me rastin, dhe se personat që kanë qenë të përfshirë në incident kanë arritur të arratisen.

Ngjarja, sipas policisë ka ndodhur rreth orës 14:30. Disa persona janë rrahur dhe kanë përdorur armë në rrugën “Shpëtim Robaj” në Komoran. Nuk raportohet për persona të lënduar.