Të zhgënjyer nga premtimet, banorët e Pocestit rregullojnë vetë rrugët e fshatit

Banorët e Pocestit në Maqellarë të Dibrës, morën një iniciativë të jashtëzakonshme për të përmirësuar kushtet e jetesës, duke shtruar rrugët dhe investuar në përmirësimin e infrastrukturës së fshatit të tyre.

Gazetari i Euronews Albania, Islam Shehu, raportoi lidhur me këtë nismë të veçantë në një lidhje live për “People” me Flori Gjinin. Ai tha se ata vendosën që të punojnë bashkë për të pasur një fshat më të zhvilluar dhe më të aksesueshëm.

“Kjo është një nismë e ndërmarrë nga djemtë e fshatit Pocest. Që në vitin 2023, të gjithë djemtë e fshatit u bënë bashkë për të shtruar rrugët e fshatit të tyre, sheshin dhe disa zona publike. Rrugët e këtij fshati kanë qenë skandaloze me baltë dhe të prishura, prandaj këta banorë vendosën të mos presin më dhe ta rregullonin vetë”, tha Islam Shehu.

Iniciativa e banorëve ka pasur një investim prej 200 mijë eurosh, dhe është realizuar me kontributin e tyre të përbashkët për të përmirësuar kushtet e jetesës në vendlindjen e tyre.

“Në të gjitha rrjetet sociale është bërë publike kjo iniciativë. Ky fshat ka pasur 2 mijë banorë, por fatkeqësisht ka mbetur me 600, pasi pjesa më e madhe e tyre kanë emigruar jashtë vendit”, tha Islam Shehu.

Kjo iniciativë nuk përfshin vetëm shtrimin e rrugëve, por gjithashtu është përfshirë edhe ndihma për sistemin e ndriçimit dhe përmirësimin e zonave publike.

LEXONI GJITHASHTU:

• Ngjarja në Astir/ “Trullosje e vajzës nga kokaina”-gazetari: Pse u alarmua policia…
• Dedektivi privat: Gratë mbi 50-vjeçe dyshojnë se burrat i tradhtojnë me sekretaret…