TEC-et lundruese të Vlorës nuk do e ndotin mjedisin, pretendon zyrtari

Dy anijet për prodhim energjie të marra me qira nga qeveria do të jenë të ankoruara në një zonë pa turistë dhe do t’i nënshtrohen zgjidhjeve teknike që të mos ndikojnë në mjedis.

Kështu tha Arbër Avrami, administrator i ‘Albgaz’ në emisionin ‘Sot’ në Euronews Albania. Avrami u shpreh se TEC-et lundruese të Vlorës janë zgjidhje emergjente në kushtet e krizës energjetike ndërkombëtare, por e cilësoi sukses të madh të qeverisë mbylljen e marrëveshjes në këtë moment kur sipas tij, këto njësi lundruese janë mjaft të kërkuara edhe në  botë.

“Anijet do të jenë të ankoruara në zonën e Triportit, një zonë pa turistë. Zgjidhja teknike që është menduar; sistemi ftohës që do të duhet që këto anije të punojnë, është një zgjidhje e mirëmenduar që të mos kenë efekt as në ujë, as në ajër”, tha Avrami

Ai sqaroi se paraprakisht është kryer një studim i thelluar për impaktin që mund të kenë në mjedis këto platforma.

“Jemi kujdesur që kjo zgjidhje të ketë përshtatje edhe me standardet mjedisore, është prodhim energjie duke përmbushur standardet mjedisore të Bankës Botërore”, tha ai.

LEXONI GJITHASHTU:

• Shqipëria merr me qira dy anije për prodhim energjie
• Energjia elektrike në Kosovë do të kushtojë 9% më shtrenjtë