Tensione në Konferencën e Kryetarëve, Gjekmarkaj: Mazhoranca po asgjëson opozitën

Në Konferencën e Kryetarëve të zhvilluar këtë të hënë në Kuvend, opozita ka shprehur kritika të forta ndaj mazhorancës.

Deputeti i Partisë Demokratike, Agron Gjekmarkaj, akuzoi mazhorancën për një “revansh politik dhe asgjësim të qëllimshëm të opozitës në Parlament”.

Ai vuri në dukje mungesën e kryetarit të grupit parlamentar të PD-së në sallë si një shenjë të përjashtimit sistematik të opozitës.

Gjekmarkaj kritikoi mënyrën e menaxhimit të punës parlamentare nga mazhoranca, duke theksuar se “me urdhra politikë po tentojnë të asgjësojnë opozitën dhe vetë Parlamentin”.

Ai njoftoi se opozita do të paraqesë në Gjykatën Kushtetuese ndryshimet në rregulloren e Kuvendit, duke kërkuar gjithashtu anulimin e dënimeve ndaj deputetëve opozitarë Gazment Bardhi dhe Fidel Kreka.

Deputeti demokrat kërkoi gjithashtu mbledhjen e Komisionit të Legjislacionit për shqyrtimin e mundësisë së një mocioni ndaj kryetarit të Konferencës, duke paralajmëruar se opozita do të përdorë çdo mundësi për të kundërshtuar veprimet e mazhorancës dhe për të mbrojtur të drejtën e saj në Parlament.

Gjekmarkaj e përshkroi sjelljen e mazhorancës si një përpjekje për minimizimin e rolit të opozitës dhe përçarjen e procesit parlamentar, duke theksuar se “parlamentarizmi kërkon vetëdije dhe seriozitet”.

Kujtojmë se këtë të hënë u zhvillua mbledhja e Konferencës së Kryetarëve, nën drejtimin e kryetarit z. Niko Peleshi, me rend dite miratimin e listës së anëtarëve të komisioneve të përhershme të Kuvendit, si dhe miratimin e listës së anëtarëve zëvendësues në përbërjen e këtyre komisioneve.

Sa i përket dy pikave të rendit të ditës, propozime janë depozituar vetëm nga Grupi Parlamentar i Partisë Socialiste. Çështja do t’i kalojë për miratim seancës plenare.

LEXONI GJITHASHTU:

• Balla thirrje opozitës: Sillni propozimet për komisionet, Bardhi duhet të ishte këtu
• Agron Gjekmarkaj feston 51-vjetorin në Lezhë, surprizohet gjatë numërimit të votave