Vlora përballet me krizën e ujit, qytetarët përplasen me policinë! Debatojnë me drejtorin e Ujësjellësit, reagon dhe kryebashkiakja: Po presim pajisjet nga Turqia

Mbi 10 autobote po sigurojnë furnizimin me ujë të pijshëm për qytetarët e Vlorës për nevoja familjare. Uji po shpërndahet nga autobotet që kanë ardhur nga Tirana, Fieri dhe shërbimi i zjarrfikësve, për të përballuar mungesën disa ditore të ujit në qytet.

Qytetarët presin në radhë për të marrë ujë, ndërsa situata mbetet e vështirë deri në rikthimin normal të furnizimit.

Ka qenë një defekt i shkaktuar në linjën kryesore të transmetimit në tubin kryesor që furnizon depot e qytetit, me diametër 1000 milimetra, çka ka bërë që Vlora të mbetet pa ujë, ndërsa specialistët nuk kanë mundur ta riparojnë për shkak të vështirësisë, pasi kjo është një linjë e veçantë.

Lidhur me situatën, ka reaguar për herë të parë Kryetarja e Bashkisë së Vlorës, Bruna Mersini. Ajo e ka cilësuar ngjarjen si një fatkeqësi natyrore dhe ka bërë thirrje që situata të mos përdoret për qëllime politike.

“Kjo është një fatkeqësi natyrore, nuk duhet përdorur për të bërë politikë. Nuk është momenti të bëjmë analiza dhe të gjejmë fajtorin, është momenti të japim zgjidhjen,” – është shprehur Mersini.

Sipas saj, zgjidhja përfundimtare është në rrugë e sipër. Kryetarja e Bashkisë bëri të ditur se pjesët rezervë për riparimin e defektit po vijnë nga Turqia.

“Në orën 02:30 zbret avioni me tre pjesë rezervë, të cilat në orën 17:00 mbërrijnë në Vlorë,” – tha ajo.

Ai u shpjegoi protestuesve arsyen e mungesës së ujit të pijshëm, ndërsa tha se që prej 72 orësh ndodhet në Vlorë dhe, ashtu si qytetarët, nuk kishte ku të lahej. Banorët qëndronin aty për të dëgjuar përgjigjet e tij dhe herë pas here e ndërprisnin.

“E di shqetësimin dhe problemin tuaj. Kemi tentuar tre herë për të rregulluar defektin, por nuk kemi arritur për shkak të presionit që ka aty dhe vendit ku ndodhi defekti. Pajisjet origjinale janë duke ardhur dhe sonte në mesnatë do të rregullohet defekti dhe do të vijë uji. Për çdo gjë do të flasim përsëri, por ju them se sot në mesnatë do të zgjidhet problemi”, tha drejtori.

Ai shtoi se janë afishuar numrat për “bote uji” që të përgjigjen për këtë situatë. “Aktualisht, kanë ardhur 11 bote uji në Vlorë për këtë qëllim”. tha ai.

Qytetarët shfaqen me bidona bosh dhe letra higjienike në duar, ndërsa kanë folur për mikrofonin e Euronews, ku e quajnë situatën katastrofike, pasi familje të tëra janë pa u larë dhe pa ujë.

Një qytetar me letra higjienike në dorë thotë: “Është turp i madh, nuk po shkojmë dot as në tualet”.

Një zonjë thotë: “Jam me topin e letrës në dorë sepse duhet të futem në bashki për të kryer nevojat personale”.

Një tjetër thotë se ka ardhur nga Gjermania dhe ka mbetur pa u larë. Ajo thotë se kërkon një gjë elementare, thjesht ujë, asgjë më shumë.

Protestuesit kërkojnë dorëheqjen e kryetares së bashkisë, Bruna Mersini.

Prej katër ditësh, qyteti i Vlorës përballet me një ndërprerje të madhe të furnizimit me ujë për shkak të një defekti në linjën kryesore të ujësjellësit. Mijëra familje janë pa ujë dhe situata ka detyruar banorët të përdorin metoda të improvizuara për të siguruar ujin e nevojshëm.

Që në orët e para të mëngjesit, rreth 10 qytetarë janë parë duke mbushur bidona direkt nga deti, ndërsa të tjerë përdorin burimet e qytetit me mjete primitive. Shërbimet kritike, përfshirë spitalin dhe institucionet e rëndësisë së veçantë, furnizohen përmes boteve të zjarrfikësve, të cilat mbushen nga burimi i njohur “Uji i Ftohtë”.

Situata ka nxitur tensione edhe në planin social: qytetarët protestuan këtë të diel duke ndërhyrë në një mbrëmje gala të organizuar nga Bashkia e Vlorës. Përplasjet me policinë shkaktuan bllokimin e bulevardit “Ismail Qemali”.

Ujësjellësi i Vlorës ka tentuar të riparojë defektin gjatë tre ditëve të fundit, por presioni i lartë i linjës shkakton përsëri çarje të pjesëve të salduara, duke pamundësuar rikthimin e furnizimit normal. Edhe tentativat e fundit gjatë mbrëmjes së kaluar kanë dështuar.

Prej katër ditësh në Vlorë vijon një defekt i rëndë në furnizimin e qytetit me ujë. Një defekt i linjës kryesore ka ndërprerë ujin për mijëra familje dhe situata ka krijuar një problem të madh. Qytetarët prej ditësh enden në burimet e qytetit me mjete provizore dhe primitive për të mbushur ujë. Nga ana tjetër, institucionet si spitali dhe disa të rëndësisë së veçantë furnizohen nëpërmjet boteve të zjarrfikësve, të cilat mbushen në burimin e “Ujit të Ftohtë”.

Këtë të dielë, qytetarët shprehën revoltën e tyre duke prishur mbrëmjen gala të organizuar nga bashkia, ku janë konfliktuar me policinë deri në përplasje fizike, pas së cilës kanë bllokuar bulevardin “Ismail Qemali”.

Ujësjellësi i Vlorës vijon punën prej tre ditësh për riparimin e defektit, por presioni i lartë i linjës që furnizon qytetin shkakton sërish çarje të pjesëve të salduara. Edhe gjatë mbrëmjes së kaluar, tentativa e fundit dështoi, duke e bërë të pamundur rikthimin e furnizimit normal me ujë.