Tensionohet situata në Leposaviç, persona të maskuar sulmojnë gazetarët

Gazetarët që po ndjekin nga afër ngjarjet në veri të Kosovës janë sulmuar në Leposaviç.

Gazetarët janë sulmuar me gurë, vezë e shishe, kryesisht nga personat e maskuar, raporton Express.

“Në Komunën e Leposaviqit aktualisht gazetarët e mbi 10 medieve janë sulmuar nga persona të maskuar. Kolegët nga Tëvë1 kanë njoftuar AGK-në, se disa persona u kanë thyer kamerën me arsyetimin që të mos i xhirojnë, pasi janë me maska. Këto sjellje nga protestuesit e maskuar janë totalisht të papranueshme, dhe u bëjmë thirrje organeve kompetente të sigurisë që janë prezent në këtë komunë, t’i sigurojnë gazetarët në mënyrë që të njëjtit të raportojnë pa u sulmuar e penguar”, thuhet në një njoftim në Asociacionit të Gazetarëve të Kosovës.

Tensionimi i situatës nisi papritur, ndërsa forcat e KFOR-it po vijojnë të qëndrojnë në afërsi të objektit të komunës.

Personat e maskuar ishin të pranishëm edhe dje në protestat në komunat veriore. Në Zveçan, kur nisi përplasja me KFOR-in, ata dolën në rresht të parë, duke sulmuar pjesëtarët e misionit paqeruajtës të NATO-s me mjete plasëse si shok-bomba e koktej molotovi.