Tërmeti 7.4 Rihter godet Tajvanin, më i forti në 25 vite! Çfarë raportohet

Një tërmet i fuqishëm goditi brigjet lindore të Tajvanit të mërkurën, duke vrarë të paktën katër persona.

Sipas mediave të huaja, tërmeti me magnitudë 7.4 të shkallës Rihter shkaktoi shembjen e ndërtesave të shumta në Hualien, qyteti më i afërt me epiqendrën, ku po zhvillohen përpjekjet e shpëtimit.

Lëkundjet më të forta që kanë goditur ishullin në 25 vjet u ndjenë edhe në brendësinë malore të Tajvanit, i cili u trondit nga rrëshqitje të mëdha dheu.

Në kryeqytetin Taipei, pamjet treguan ndërtesa duke u lëkundur fuqishëm.

“Tërmeti është afër tokës dhe është i cekët. Është ndjerë në të gjithë Tajvanin dhe ishujt në det… Është më i forti në 25 vjet,” tha Wu Chien Fu, drejtori i Qendrës së Sizmologjisë në Taipei.

Agjencia Kombëtare e Zjarrfikësve tha se tre persona kanë vdekur në një shteg përreth Parkut Kombëtar Taroko, një grykë e rëndësishme jashtë Hualien.

Më shumë se 50 njerëz janë plagosur, me disa të bllokuar në ndërtesa dhe tunele përreth qytetit, shtoi agjencia.

Gjigandi tajvanez i prodhimit të çipave TSMC tha se ka evakuuar disa persona nga fabrikat e tij në Hsinchu dhe Tajvanin jugor për sigurinë e stafit të tij, por shtoi se sistemet e tij të sigurisë funksionojnë normalisht. TSMC është një prodhues i madh i gjysmëpërçuesve për firmat e teknologjisë duke përfshirë Apple dhe Nvidia.

LEXONI GJITHASHTU:

• Tërmeti godet Greqinë, lëkundjet ndihen edhe në Turqi
• Një tërmet i fortë godet Greqinë, sa ishte magnituda