Thaçi në intervistën e parë pas burgosjes, përcjell mesazhin e rëndësishëm

Ish-presidenti i Kosovës, Hashim Thaçi, në një intervistë të dhënë për Nacionalen nga Haga, ka thënë se me Serbinë duhet të arrihet paqe e përhershme, me njohje reciproke e ligjërisht detyruese.

Thaçi tha se sa më shumë vonohet kjo, aq më e vonuar do të jetë Kosova në BE e NATO.

“Me Serbinë duhet të arrihet paqe e përhershme, me njohje reciproke, ligjërisht obliguese. Sa më shumë që vonohet kjo marrëveshje, aq më e vonuar do të jetë Kosova në NATO dhe BE, e aq më e zbehtë do të jetë mbështetja e ShBA-së .Përvoja ime më tregon se Brukseli e mbështet Kosovën, për aq sa e inkurajon dhe e mbanë në vëmendje atë Uashingtoni. Aleanca me ShBA-në duhet kultivuar për të ardhmen strategjike, e jo veç për kujtesë falënderimi”, tha Thaçi për Nacionalen.

Në këtë instervistë, ish-presidenti përcolli dhe një mesazh për klasën politike dhe qytetarët e Kosovës.

“Unë vazhdoj të besoj se vetëm duke qëndruar të bashkuar si popull, mund t’i tejkalojmë sfidat. Të bashkuar ia dolëm në procesin e lirisë dhe pavarësisë, e ashtu duhet të vazhdojmë edhe në fazën e integrimit euro-atlantik. Ky unitet qytetar dhe institucional duhet të mishërohet në vlerat perëndimore, në kuptimin e ecjes përpara, e jo bashkim në kauza të gabuara. Jo të kalohet koha së bashku duke reflektuar për ballafaqimet e së kaluarës, por të hidhet shikimi kah e ardhmja”, u shpreh Thaçi.

Sipas tij, uniteti brendashqiptar dhe investimi për pajtim ndëretnik janë çelësi i suksesit.

“E kaluara jonë nuk është sfiduese, ajo është e fituar, është shumë krenare dhe me integritet, atë nuk mund dhe nuk duhet të tentojmë ta ndryshojmë. Sfidat dhe zgjidhjet i kemi përpara. Njerëzit duan zhvillim, vende pune, mirëqenie, edukim cilësor, shërbim shëndetësor, ambient më të pastër, etj. Duhet kujdes që, duke u marrë shumë me të kaluarën të mos vonohet, rrezikohet apo edhe të humbet e ardhmja. Uniteti brendashqiptar dhe investimi për pajtim ndëretnik janë çelësi i suksesit për Kosovën. Bota po lëviz dhe po ndryshon më shpejtë se sa intuitat apo agjendat tona lokale”, ka thënë Thaçi.

Ish-presidenti Thaçi vlerëson se “çdo krizë e vonon shumë Kosovën, por edhe i minon përpjekjet e miqve ndërkombëtarë për ta konsoliduar shtetin e Kosovës në rrafshin e brendshëm, por edhe në afirmimin e saj ndërkombëtar”.

Prandaj ai thotë se “përkrahja ndërkombëtare nuk duhet të merren si e mirëqenë. Ajo gjithmonë duhet merituar. Kosova çdo ditë duhet të vazhdojë të prodhojë argumente që e lehtësojnë mbështetjen e miqve ndërkombëtar”.

Intervistën e tij e ka postuar dhe kryeministri Edi Rama në faqen e tij zyrtare në Facebook.

LEXONI GJITHASHTU:

• Hashim Thaçi në Kosovë, viziton babain e sëmurë
• Mbrojtja e Thaçit: Të deklarohet se hetimet për trafikim organesh kanë përfunduar