Thaçi nuk u lejua të marrë pjesë në varrimin e të atit, reagon Richard Grenell

Edhe emisari amerikan për misione të posaçme, Richard Grenell reagoi kundër vendimit të Gjykatës Speciale për të mos lejuar ish-presidentin e Kosovës Hashim Thaçi për t’i dhënë lamtumirën e fundit babait të tij.

Grenell ka shpërndarë postimin e kryeministrit Edi Rama në rrjetin social X, i cili kritikonte ashpër gjykatën për refuzimin e kërkesës së Thaçit, teksa shkruante se “e ka kthyer drejtësinë ndërkombëtare në një farsë”.

“Një poshtërim i ri nga një tribunal i turpshëm dhe i paturpshëm, i cili e ka kthyer drejtësinë ndërkombëtare në një farsë, të drejtat demokratike në fjalë boshe dhe vullnetin e mirë të Parlamentit të Kosovës në bumerangun më brutal!”, shkroi Rama në X.

Prej vitit 2020 Thaçi qëndron në paraburgimin e Hagës ndërsa më 13 mars me lejen e gjykatës ai vizitoi babain e tij në Prishtinë, i cili ndodhej në spital në gjendje të rëndë shëndetësore ndërsa u nda nga jeta të dielën në mbrëmje, më 16 mars.

LEXONI GJITHASHTU:

• Gjykata Speciale nuk lejon ish-Presidentin Thaçi të marrë pjesë në varrimin e babait
• Hashim Thaçi mbërrin në Kosovë për të vizituar babanë e sëmurë