Thirrja e drejtorit të ISSH: Mos mendoni për pensionin kur të shkoni 65 vjeç

Drejtori i ISSH, Astrit Hado tha në emisionin Barometri në Euronews Albania se një person që nuk ka paguar kontribute shoqërore gjatë gjithë viteve të jetës nuk duhet të marrë pension.

Hado e cilësoi të palogjikshme të mendosh për pensionin kur je në moshë pleqërie, një gjë për të cilën siç tha duhet menduar që kur nis të punosh.

“Kush do ta financojë pensionin e një gruaje që nuk ka paguar kontribute? Sigurisht që duhet të rrinë pa pension. Pse? Sepse nuk duhet të mendosh për pension kur mbush 65 vjeç, se kur të vish në këtë moshë do jesh para një tavoline ku do të llogariten vitet e punës dhe do të lidhet pensioni. Për pension nuk mendohet kur vete 65 vjeç, por kur fillon të punosh. Edhe nëse kanë qenë në emigracion të mendonin  të siguroheshin në mënyrë vullnetare. Secili njëri duhet të fillojë të mendojë për pensioni shumë herët”, tha Hado.