Thirrjet nacionaliste kundër maqedonasve, Mirlind Daku kërkon falje

Sulmuesi i Kombëtares, Mirlind Daku ka kërkuar falje publike duke thënë se ishte nën efektin e emocioneve kur ofendoi tifozët e Maqedonisë së Veriut. Pas ndeshjes Kroaci 2-2 Shqipëri në Euro 2024, Daku mori megafonin dhe foli para tifozëve kuqezi.

Në një shkrim në Facebook, Daku ka thënë se fyerjet e tij kanë qenë afekt i lojës.

“Ndjesë nëse kam fyer dikë pas ndeshjes me Kroacinë, afekti i lojës e bën të vetën, unë vazhdoj të punoj së bashku me gjithë grupin rreth ëndrrave tona. Falja është burrërore, dhe e ndiej obligim moral dhe profesional ta bëj një gjë të tillë, për gjithë ata që janë lënduar”, ka shkruar ai në Facebook.

Në postimin në Facebook, Daku ka shprehur falënderime për përkrahësit e Shqipërisë.

“Si çdo futbollist, në ato momente emocionet janë në një nivel tjetër, ku vetëm brenda fushës mund të kuptohen, është e vështirë të përshkruash ndjenjën e të luajturit për këtë Kombëtare, për këta tifozë të mrekullueshëm që na japin dashni pa kufi, ashtu siç është dhe moto jonë, ‘Shqipëri dashni pa kufi’”, ka shkruar ai.

LEXONI GJITHASHTU:

• Daku mori megafonin dhe shau maqedonasit, reagon Federata e RMV: Të kërkojë falje
• Përfundon ndeshja Shqipëri-Kroaci, kuqezinjtë barazojnë në minutat shtesë