Seanca e radhës për çështjen e njohur si “Plumbi i Artë” është shoqëruar me tensione, pasi avokatja e Altin Ndocit pretendoi se u kërcënua me jetë nga i penduari i drejtësisë, Nuredin Dumani.
Gjatë procesit gjyqësor, avokatëve iu dha e drejta të drejtonin pyetje ndaj Dumanit për ngjarje të ndryshme kriminale. Në një moment avokatja e Altin Ndocit ndërhyri, duke pretenduar se Dumani e kishte kërcënuar në momentin kur gjykata vendosi të ndërpriste seancën për një pushim 10-minutësh.
Avokatja mori fjalën dhe kërkoi ndërhyrjen e menjëhershme të trupës gjykuese për hapjen e prcesverbalit audio.
“Para se të ndërprisni seancën, ju lutem të dëgjoni procesverbalin audio. Teksa po flisnit, i penduari më tha: ‘Do merrem dhe me ty, më ke ngelur ti pa vrarë’. Nuk mund të lejojmë kërcënime të tilla!” – deklaroi avokatja.
Gjatë pyetjeve të drejtuara nga avokatët, Dumani dha detaje mbi jetën e tij dhe përfshirjen në veprimtari kriminale:
Sokol Hazizaj: Në cilat qytete keni jetuar?
Nuredin Dumani: Jam shpërngulur nga Dibra drejt Rrogozhinës, më pas kam jetuar në Durrës dhe kam lëvizur herë pas here. Në vitin 2020 kam marrë një apartament në Elbasan, përballë parkut.
Avokati: A i njihni rrugët e qyteteve ku keni jetuar?
Dumani: Varet, disa rrugë i njoh më mirë se të tjerat.
Avokati: Gentian Sharrën nga e njihni?
Dumani: E njoh nga Talo Çela, që nga viti 2010-2011. Ai kishte një lokal pranë shtëpisë së Talos në Bradashesh.
Dumani tregoi detaje për grabitjet e organizuara me Gentian Sharrën, duke përmendur një ngjarje të rëndësishme në Elbasan:
“Në vitin 2011 ose fillim 2012, kemi grabitur një argjendari në Elbasan. Viktimën nuk e kisha parë më parë, por e kishte planifikuar Gentian Sharra, i cili kërkonte të merrte pjesë sepse ishte një grabitje e madhe.”
“Ilirjan Keçi dhe unë do shkonim të parët dhe do ta godisnim viktimën në një parkim të një lagjeje të vjetër. Ai po shkonte drejt makinës së tij, një ‘Benz’ i vjetër. Më pas, Talo Çela dhe Sharra do të vinin më vonë.”
LEXONI GJITHASHTU:
- Rrëfehet Nuredin Dumani, dëshmon lidhjet me policinë: Si kaloja me armë në kufi
- Nga Talo Çela te vëllezërit Çopja, Dumani tregon listën me 10 emra që i dha Alibej
