“TikTok” mbyllet më 13 mars, veprimet që do të merren për bllokimin e aplikacionit

Aplikacioni TikTok do të mbyllet për përdoruesit në Shqipëri duke filluar nga data 13 mars 2025, pas një vendimi të marrë nga Këshilli i Ministrave.

Ky bllokim do të zgjasë për 12 muajt e ardhshëm dhe do të prekë të gjithë përdoruesit e platformës në territorin shqiptar.

Këshilli i Ministrave ka miratuar këtë masë në mbledhjen e datës 7 mars 2025, duke e bazuar atë në nevojën për të zbatuar standardet e sigurisë dhe moshës për përdoruesit e mitur.

Pas këtij vendimi, Autoriteti Kombëtar për Sigurinë Kibernetike (AKSK) ka kërkuar nga kompanitë e internetit që të ndërmarrin veprimet e nevojshme për bllokimin e aksesit në platformën TikTok, duke përfshirë bllokimin e IP-ve, DNS-ve, SNI dhe të adresave të kompanisë ByteDance.

Kërkesa e AKSK-së përmban instruksione të detajuara për kompanitë e internetit, ku specifikohet se duhet të bllokohen IP-të dhe domainet që lidhin përdoruesit shqiptarë me TikTok, duke përfshirë të gjithë infrastrukturën digjitale të platformës në Shqipëri.

Në përputhje me legjislacionin, çdo operator i shërbimeve të komunikimeve elektronike është i detyruar të respektojë këto kufizime dhe të raportojë në Autoritetin e Komunikimeve Elektronike dhe Postare (AKEP) për zbatimin e masave deri më 13 mars 2025.

Vendimi për mbylljen e TikTok është mbështetur në ligjin nr. 54/2024 “Për komunikimet elektronike në Republikën e Shqipërisë” dhe rregulloren për zbatimin e regjimit të autorizimit të përgjithshëm.

Ky hap është ndërmarrë për të mbrojtur sigurinë dhe interesat e përdoruesve të mitur në Shqipëri.

LEXONI GJITHASHTU:

• AKSK: Kompanitë e internetit të marrin masa në bllokimin e aksesit në Tik Tok
• Aksioni i PD për mbylljen e Tik Tok, nga thirrja për bojkotin e mësimit te protesta