Tragjedi në Gjermani, 63-vjeçari vret familjen dhe më pas i jep fund jetës

Një tragjedi familjare që përfshin një 63-vjeçar, i cili vrau gruan, motrën dhe dy djemtë e tij në rajonin e Reutlingenit në Gjermani, u bë e ditur të martën. Pas vrasjeve, burri, që ishte me profesion gjuetar, i dha fund jetës së tij. Policia njoftoi se të pesë viktimat ishin qëlluar me armë zjarri.

Motra 60-vjeçare, gruaja 57-vjeçare dhe djemtë 27 dhe 29 vjeç u gjetën të vdekur në vende të ndryshme të qytetit.

Krimi u zbulua pasi një kujdestar gjeti motrën e 63-vjeçarit të pajetë në apartamentin e saj të martën në mëngjes. Hetimet e policisë që pasuan e identifikuan menjëherë 63-vjeçarin si të dyshuarin kryesor.

Forcat speciale gjermane zhvilluan një operacion në banesën e tij, ku gjetën trupat e burrit dhe bashkëshortes së tij, të cilët kishin ndërruar jetë nga plagët e armës së zjarrit. Pranë trupit të 63-vjeçarit u gjet edhe arma e përdorur, megjithëse ende nuk është konfirmuar nëse ai e posedonte me leje si gjuetar.

Më vonë, trupat e dy djemve të tij, të moshës 27 dhe 29 vjeç, u zbuluan në një ndërtesë tjetër.