Tragjedia e 18-vjeçarit në Durrës, roja bregdetare tregon si ndodhi ngjarja

Familja Kashiku hapi sot dyert e mortit. Mes dhimbjes së thellë ata i dhanë lamtumirën e fundit 18-vjeçarit Anri Kashiku, i cili u mbyt pasditen e djeshme duke shpëtuar dy të mitur 15-vjeçarë.

Në të gjithë zonën ka kapluar zija. Fqinj e të afërm, të shokuar nga ajo që ndodhi, vlerësojnë aktin e tij heroik.

“Hallall i qoftë. Ka shpëtuar villain e tij dhe një tjetër. Ka bërë heroizëm”, u shprehën ata.

Por kjo tragjedi mund të shmangej, nëse kullat e vrojtimit nuk do të ishin thjesht fiktive.

Roja bregdetare pohon se ka ngritur flamurin e kuq gjatë kohës kur deti ka qenë i trazuar, gjë që sinjalizon pushuesit që nuk duhet të futen në ujë.

“Pavarësisht se nuk lejohet se ishte deti i trazuar, kemi pasur flamurin e kuq”, tha ai.

Ai tregon se Anri u fut në det bashkë me të, por nuk mundi të dilte i gjallë prej andej.

“Kam vrapuar për te dy personat, nuk kisha kohë të merrja ndihmesat. Personi i tretë që ka ardhur, erdhi prapa meje, për të ndihmuar villain e tij”, u shpreh roja bregdetare.

Për ngjarjen tragjike reagoi sot policia e Durrësit, e cila theksoi se pas ndihmës së dhënë, fëmijët janë nxjerrë në breg, ndërkohë që 18-vjeçari nuk ka mundur të dalë dot, pasi është mbytur për shkak të dallgëve të larta.

Nga vëzhgimi i kryer nga “Euronews Albania” Një ditë pas tragjedisë, janë kthyer në vendin e punës vrojtuesit e plazheve.

LEXONI GJITHASHTU

• Protestë para ministrisë së Turizmit për të mbyturit
• U fut për të shpëtuar vëllain dhe shokun, detaje nga mbytja e 18-vjeçarit
• U fut në det për të shpëtuar të miturit, mbytet 18-vjeçari