Tragjedia e emigrantëve në Itali, të burgosurit “ringjallin” mbetjet e anijeve

Kriza e emigrantëve dhe mijëra vdekjet në përpjekje për të arritur Evropën përmes detit kanë nxitur të dënuarit në burgun e Milanos të prodhojnë violina dhe violonçela me mbetjet e varkave prej druri.

Projekti “Metamorfoza” është një formë rehabilitimi për të dënuarit dhe për t’u dhënë, në kuptimin figurativ, një jetë të re mbetjeve të varkave të përdorura, në mënyrë që tragjeditë të mos harrohen.

 “Ky projekt lindi nga pyetja ‘përse ata dhe jo unë?’. Përse në ato varka ishin ata fëmijë dhe jo djali im? Kur pashë ata fëmijë që zbrisnin nga varka në Lampeduza mësova se ato varka shkatërroheshin nga qeveria dhe mendova, përse këto mbetje të mos bëhen një kujtim i gjallë për t’i kujtuar kujtdo këtë dramë që mund të kishte qenë edhe e imja apo e djalit tim? Sepse po të kishim lindur atje, e njëjta gjë do të na kishte ndodhur neve”,-tha Arnoldo Mosca Mondadori, president i fondacionit Shtëpia e Shpirtit dhe Arteve.

Reflektimet arritën deri në teatrin “La Scala” të Milanos natën kur “Orkestra e Detit” vendosi t’u jepte jetë instrumenteve të krijuara në burgun italian, si një mënyrë për të kujtuar se mbi 22 mijë e 800 emigrantë, sipas shifrave të OKB-së, kanë vdekur ose janë zhdukur që prej 2014-s në udhëtimin e rrezikshëm për të kaluar Mesdheun.

LEXONI GJITHASHTU:

• Itali/ 17 vjeçarja godet me thikë vëllain e saj për shkak të zhurmës së PlayStation
• Sulm me thikë në shkollë në Itali, adoleshenti godet disa herë mësuesen