Tre javë para se ta vriste, 36-vjeçarja i shpëtoi jetën bashkëshortit nga vetëvarja

Vetëm tre javë para se të vritej nga bashkëshorti i saj, Marjola Nakoleci kishte shpëtuar jetën e tij duke e ndaluar nga një tentativë vetëvarjeje. Ky detaj është bërë i ditur nga motrat e viktimës, të cilat thonë se 36-vjeçarja prej kohësh ishte nën dhunë sistematike dhe presion të vazhdueshëm.

Trupi i pajetë i Marjola Nakolecit ka mbërritur në Korçë, ku sot në orën 11:00 do të zhvillohet ceremonia mortore. Familjarët janë në gjendje të rënduar emocionale dhe kanë refuzuar kontaktet me median, ndërsa vajza e madhe e viktimës ka deklaruar se ka mohuar babain e saj dhe do të marrë hak për gjakun e nënës.

Sipas dëshmive të familjarëve, Pandeli Nakoleci ushtronte dhunë të vazhdueshme, e akuzonte gruan për tradhti dhe shpeshherë e detyronte të kryente marrëdhënie seksuale pa dëshirë, me qëllim për ta mbajtur të lidhur përmes një shtatzënie. Vetëm një muaj më parë, gjinekologu i kishte vendosur Marjolës masa parandaluese shtatzënie.

36-vjeçarja, nënë e katër fëmijëve, sot do të përcillet për në banesën e fundit mes dhimbjes së familjes dhe komunitetit.

LEXONI GJITHASHTU:

• Vrau gruan në sy të fëmijëve, arrestohet autori i krimit në Greqi
• Krim në familjen shqiptare në Greqi, burri vret gruan! Djali: Pashë babin me thikë