Trump akuzon Biden si fajtor të përshkallëzimeve të luftrave në botë

Ish-presidenti amerikan dhe kandidati republikan për president, Donald Trump, pretendoi të hënën se presidenti  Joe Biden u detyrua të hiqte dorë nga gara presidenciale, duke e cilësuar largimin e tij një “grusht shteti”.

“Unë e munda Biden aq keq në debat që ai u detyrua të largohej nga gara – një nga shfaqjet më të mëdha të debatit ndonjëherë. Dalja e Bidenit, ishte një grusht shteti”, tha Trump në një intervistë të drejtpërdrejtë me Elon Musk në X.

“Ky ishte një grusht shteti i një presidenti të Shteteve të Bashkuara. Ai nuk donte të largohej dhe ata thanë: ‘Ne mund ta bëjmë atë në mënyrën e mirë, ose ne mund ta bëjmë atë në mënyrën e vështirë’, shtoi Trump.

Ai e quajti atë “presidenti më i keq në histori”, por shtoi se zëvendëspresidentja Kamala Harris, e cila zëvendësoi Biden si kandidate demokrate, është gjithashtu “e paaftë”.

Trump gjithashtu fajësoi Biden për luftën e Rusisë ndaj Ukrainës, duke thënë se kjo nuk do të kishte ndodhur kurrë nëse ai do të ishte president.

“Sulmi izraelit nuk do të kishte ndodhur kurrë. Rusia nuk do ta kishte sulmuar kurrë Ukrainën, nuk do të kishim inflacion dhe nuk do të kishim rrëmujën në Afganistan”, tha ai.

“Me presidentin rus Vladimir Putin shkova shumë mirë dhe ai më respektoi”, tha Trump, duke shtuar se ata do të flisnin shumë për Ukrainën.

Ai akuzoi gjithashtu Hillary Clinton, e cila ishte kandidatja e Partisë Demokratike për president në vitin 2016, dhe kryetarin e Inteligjencës së Dhomës së Përfaqësuesve, Adam Schiff për atë që ai e quajti “mashtrimi i Rusisë”, në lidhje me akuzat për ndërhyrje ruse në zgjedhjet presidenciale të 2016 në SHBA.