Trump i ofron akord Teheranit pas alarmit të Agjencisë së OKB-së

Shtetet e Bashkuara i kanë dërguar Iranit një propozim për një marrëveshje bërthamore, ka bërë të ditur Shtëpia e Bardhë.

Edhe ministri i Jashtëm iranian, Abbas Araghchi tha se ishte vënë në dijeni mbi elementet e ofertës amerikane nga homologu i Omanit, gjatë një vizite të shkurtër të tij në Teheran.

Lëvizja erdhi pas një raporti të Agjencisë së OKB-së për Energjinë Atomike, se Republika Islamike kishte avancuar prodhimin e uraniumit të pasuruar, një përbërës kyç në prodhimin e armëve bërthamore.

Zëdhënësja e Shtëpisë së Bardhë, Karoline Leavitt deklaroi se ishte në interesin më të mirë të Iranit ta pranonte marrëveshjen. “Presidenti Trump e ka bërë të qartë se Irani nuk mund të ketë kurrë bombë bërthamore”, tha Leavitt.

Ajo shtoi se propozimi që i është dërguar Iranit me nismë të presidentit Trump është “i detajuar dhe i pranueshëm”.

Nga ana e tij, shefi i diplomacisë iraniane theksoi se përgjigjja e Teheranit do të jetë në linjë me parimet, interesat kombëtare dhe të drejtat e qytetarëve iranianë.

Detajet e sakta të propozimit nuk janë bërë ende publike. Por ai vjen pasi Agjencia e OKB-së vlerësoi se Republika Islamike posedon aktualisht mbi 400 kilogramë uranium të pasuruar me një pastërti prej 60 për qind, nga 90 që kërkohet për të prodhuar armë me fuqi atomike.