“Trump ia ka falur Ukrainën, Putinit”, Muçi: Pse dështoi takimi me Zelensky-n

Takimi i dështuar mes Donald Trump dhe Volodymyr Zelenskyt i mbajtur të premten në Zyrën Ovale ka qenë në qendër të diskutimeve këtë të shtunë.

Profesori dhe aktivisti i “Lëvizja Bashkë”, Redi Muçi tha se takimi dështoi pasi presidenti i SHBA-ve Trump ka pranuar kërkesat e Putinit, pasi sipas tij, Trump i intereson që konflikti të mbyllet sa më parë.

“Donald Trump, ka ardhur në pozitat e Putinit pasi ai do ta mbyllë këtë konflikt që nesër. Nëse evropa dhe qasja e Bidenit ishte që Ukraina duhet të qendronte nën sferën e influencës perëndimore, Trump ia ka falur Ukrainën, Putinit.

Unë jam kundër edhe ndaj qasjes së Biden. Por Putini kërkonte në radhë të parë heqjen e Zelenskyyt, kërkoi që Ukraina të mos futet në NATO dhe e treta, do të mbajë territoret që ka pushtuar plus Krimenë. Kjo ka qenë qasja e Putinit që në nisje të luftës.

Trumpi e ka quajtur Zelensky, diktator para se ta ftonte në takim. Ka tentuar të bëjë një marrëveshje për metalet e cila nuk i linte asnjë diskutimi Zelenskyt dhe së treti është ende e paqartë pozita e Amerikës sa i përket zonave të pushtuara nga Rusia. Praktikisht Trump i ka thënë Putinit “kërkesat e tua i ke, ne do bullizojmë më të dobëtin dhe do i japim fund konfliktit”,-tha Muçi.

Ai shtoi se edhe qasja e Biden dhe e Evropës që bënë që ky konflikt të tejzgjatej ka qenë e gabuar.

LEXONI GJITHASHTU:

• “Ne jemi me Ukrainën”, Starmer përqafon Zelenskyn para bisedimeve në Downing Street
• Prapaskenat: Trump i kërkoi Zelenskyt të vishej me kostum, u irritua kur e pa