Trump: Irani nuk do të ketë kurrë armë bërthamore, vranë 32,000 protestues

Në fjalimin e tij për Gjendjen e Kombit, Donald Trump e paraqiti Iranin si një kërcënim të drejtpërdrejtë dhe të vazhdueshëm, duke e cilësuar shtetin si “sponsori kryesor i terrorizmit në botë”. Ai paralajmëroi se Irani nuk do të lejohet kurrë të pajiset me armë bërthamore dhe akuzoi regjimin për vrasjen e 32,000 protestuesve gjatë trazirave të fundit brenda vendit.

“Ata u paralajmëruan të mos rindërtonin programin e armëve, veçanërisht ato bërthamore. Ne e zhdukëm dhe ata duan ta nisin sërish.Ata janë njerëz të tmerrshëm, ata vranë 32,000 protestues. Tani po negociojmë, ata duan një marrëveshje, por nuk do të kenë kurrë një armë bërthamore. Unë kurrë nuk do të lejoj që sponsori numër një i terrorizmit në botë të ketë armë bërthamore”, deklaroi presidenti.

Trump kujtoi gjithashtu sulmet ushtarake amerikane ndaj Iranit, përfshirë operacionin “Midnight Hammer” të qershorit të kaluar, dhe theksoi se çdo përpjekje për rindërtimin e programit bërthamor të Iranit nuk do të tolerohet. Ai shtoi se preferon zgjidhjen përmes diplomacisë, por paralajmëroi se SHBA nuk do të lejojë që Irani të zotërojë armë bërthamore.

Komentet e tij erdhën në një kohë kur SHBA po forcon prezencën ushtarake në Lindjen e Mesme dhe para bisedimeve të planifikuara për 26 shkurt mbi programin bërthamor iranian, të cilin Teherani e quan të destinuar për qëllime civile dhe paqësore.

Duke iu referuar regjimit klerikal që sundon Iranin që nga revolucioni i vitit 1979, Trump tha: “Që kur ata morën kontrollin e këtij kombi krenar 47 vjet më parë, regjimi dhe përfaqësuesit e tij vrasës nuk kanë përhapur gjë tjetër veçse terrorizëm, vdekje dhe urrejtje.”

Ai theksoi gjithashtu kostot njerëzore të trazirave të brendshme, duke përmendur të paktën 32,000 protestues të vrarë, një shifër që mbështetet pjesërisht në raportet e grupeve të të drejtave të njeriut dhe që besohet të jetë më e lartë.

Fjalët e Trump për Iranin u bënë ndërsa administrata amerikane vijon bisedimet për të ulur tensionet dhe për të adresuar programin bërthamor iranian. Dërguari kryesor i SHBA-së, Steve Witkoff, raportoi për “përparim domethënës” gjatë raundit të fundit të takimeve trepalëshe në Gjenevë, pa dhënë detaje specifike.

Trump gjithashtu bëri një krahasim me konfliktin në Ukraine, duke theksuar numrin e të vdekurve dhe të plagosurve, dhe përsëriti pohimin se lufta “nuk do të kishte ndodhur kurrë nëse unë do të isha president”.