Trump kundër gjyqtares: Të largohet, nuk mund të kem një proces të drejtë

Donald Trump ka deklaruar se do t’i kërkojë gjyqtares së çështjes ku akuzohet për mashtrim elektoral që të tërhiqet për shkak se ndikohet nga pushtete shumë të fuqishme.

Trump tha se nuk ka asnjë shans që ai të ketë një proces të drejtë gjyqësor me gjyqtaren aktuale, veç rastit nëse ajo ndërrohet.

Apeli i tij erdhi pasi organi i akuzës kërkoi një urdhër gjykate që të kufizonte atë që ish-presidenti mund të thotë publikisht lidhur me çështjen.

Gjyqtarja Tania Çutkan u caktua nga presidenti i mëparshëm i Shteteve të Bashkuara, Barack Obama.

Trump përdori rrjetin e tij social “Truth Social”, për ta cilësuar procesin si “qesharak” sa i takon lirisë së shprehjes dhe mbajtjes së zgjedhjeve të ndershme.

Ai nënvizoi se ekipi i tij ligjor do të kërkojë menjëherë largimin e gjyqtares nga çështja, por nuk dha detaje mbi se cilat baza do ta kërkojë këtë gjë.

Gjyqtarja Çutkan, e caktuar në 2014-n, më herët vendosi kundër përpjekjeve të zotit Trump për të mbuluar provat lidhur me kryengritjen e 6 janarit.

Ajo është gjithashtu e vetmja gjyqtare federale në Uashington, që ka dhënë dënime kundër të pandehurve të lidhur me kryengritjen në Capitol Hill, të cilat janë më të gjata se ato të kërkuara nga Departamenti i Drejtësisë.

LEXONI GJITHASHTU:

• Gjyqi ndaj Trump, ish-Presidenti: Nëse nuk më lini të qetë, as unë nuk do t’ju lë
• Trump thotë se është i pafajshëm për akuzat lidhur me dokumentat e klasifikuara