Trump mund të ndalojë hyrjen në SHBA për qytetarët e 41 vendeve të botës

Administrata e Presidentit të Shteteve të Bashkuara, Donald Trump, po shqyrton vendosjen e kufizimeve të udhëtimit për qytetarët e shumë vendeve si pjesë e një ndalimi të ri, sipas një memo të brendshme të parë nga Reuters dhe të konfirmuar nga burime të njohura me situatën.

Memorandumi rendit gjithsej 41 vende, të ndara në tre grupe.

Grupi i parë, i cili përfshin Afganistanin, Iranin, Sirinë, Kubën dhe Korenë e Veriut, parashikon një pezullim të plotë të dhënies së vizave.

Në grupin e dytë, pesë vende – Eritrea, Haiti, Laosi, Mianmari dhe Sudani i Jugut – do të përballeshin me një pezullim të pjesshëm, i cili do të prekte vizat turistike dhe studentore, si dhe vizat e tjera emigruese, me disa përjashtime.

Grupi i tretë përfshin 26 vende, duke përfshirë Bjellorusinë, Pakistanin dhe Turkmenistanin, të cilat do të konsideroheshin për pezullim të pjesshëm të lëshimit të vizave të SHBA nëse qeveritë e tyre “nuk marrin hapa për të adresuar mangësitë brenda 60 ditëve”, thuhet në memorandum.

Një zyrtar amerikan, i cili foli në kushte anonimiteti, paralajmëroi se lista mund të jetë subjekt i ndryshimeve dhe nuk ishte miratuar ende nga administrata.

Kjo nismë e Trump është pjesë e një procesi më të gjerë të shtrëngimit të politikës së imigracionit që filloi në fillim të mandatit të tij të dytë.

LEXONI GJITHASHTU:

• Trump: Isha pak sarkastik kur premtova fundin e luftës Rusi-Ukrainë për 24 orë
• Trump lëshon urdhër për eliminimin e shtatë agjencive