Trump nuk e përjashtoi përdorimin e forcës për të marrë Grenlandën, reagon Rusia

Zëdhënësi i Kremlinit, Dmitry Peskov, ka deklaruar se Rusia po monitoron me vëmendje situatën pas deklaratave të presidentit të zgjedhur të SHBA-së, Donald Trump, i cili refuzoi të përjashtonte mundësinë e përdorimit të forcës për të marrë Grenlandën nga Danimarka.

Peskov theksoi se Arktiku është një “sferë e interesave kombëtare dhe strategjike” për Rusinë dhe se vendi është i angazhuar për paqen dhe stabilitetin në këtë rajon. Komentet e Trump, që sugjeronin mundësinë e marrjes së Grenlandës, një territor autonom të Danimarkës, kanë ngjallur shqetësime ndërkombëtare, duke përfshirë udhëheqësit evropianë, të cilët theksuan se nuk duhej të prekej integriteti territorial i Grenlandës.

Kryediplomatja e BE-së, Kaja Kallas, deklaroi se duhet të respektohet sovraniteti i Grenlandës, ndërkohë që kancelari gjerman, Olaf Scholz, theksoi se “kufijtë nuk duhet të zhvendosen me forcë”. Trump deklaroi se SHBA-ja kishte nevojë për të kontrolluar si Grenlandën, ashtu edhe Kanalin e Panamasë për “sigurinë ekonomike” të vendit, duke refuzuar të përjashtonte përdorimin e forcës ekonomike ose ushtarake.

Sekretari amerikan i Shtetit në largim, Antony Blinken, u mundua të zbutë shqetësimin ndërkombëtar duke thënë se ideja e Trump ishte “padyshim një ide që nuk do të ndodhë”. Ndërkohë, Sekretari i Jashtëm i Mbretërisë së Bashkuar, David Lammy, kritikoi komentet e Trump, duke i cilësuar si destabilizuese.

Kryeministri i Groenlandës, Mute Egede, ka theksuar se territori nuk është në shitje dhe ka kërkuar pavarësinë, ndërkohë që Kryeministrja daneze Mette Frederiksen ka shprehur mbështetje për aleancën e ngushtë mes SHBA-së dhe Danimarkës në këtë çështje.

Disa zyrtarë të Trump kanë mbështetur qëndrimin e tij për Grenlandën. Keith Kellogg, i dërguari i Trump për Ukrainën dhe Rusinë, e quajti strategjinë e presidentit të zgjedhur si një mënyrë për të pozicionuar SHBA-në si lider global. Kongresmeni republikan, Mike Ëalz, gjithashtu e lidhi çështjen e Grenlandës me dominimin e Arktikut dhe burimet e tij natyrore, duke theksuar rëndësinë e kontrollit të kësaj zone.

LEXONI GJITHASHTU:

• Putin: Rusia gati për negociata, por marrëveshja të mos firmoset nga Zelensky
• Putin: Duhet të kisha pushtuar Ukrainën më herët