Trump padit New York Times-in për shpifje, kërkon 15 miliardë dollarë

Presidenti i Shteteve të Bashkuara, Donald Trump, ka paditur gazetën prestigjoze The New York Times, katër gazetarë të saj dhe shtëpinë botuese Penguin Random House, duke kërkuar dëmshpërblim prej të paktën 15 miliardë dollarësh. Trump pretendon se ka qenë viktimë e shpifjeve dhe se i është dëmtuar reputacioni personal, por dhe biznesi i tij.

Padia, e dorëzuar në Gjykatën e Qarkut të Floridës, përfshin disa shkrime të gazetës, përfshirë një editorial para zgjedhjeve presidenciale të 2024-ës që deklaronte se ai nuk ishte i denjë për postin e presidentit, si dhe librin e publikuar nga Penguin, titulluar “Humbësi me fat: Si e shpërdoroi Donald Trump pasurinë e të atit dhe krijoi iluzionin e suksesit”.

Në dokumentet e dorëzuara, avokatët e Trumpit theksojnë se botimet kanë qenë me keqdashje dhe të mbushura me shtrembërime, duke shkaktuar dëme të konsiderueshme ekonomike dhe reputacionale.

Padia erdhi pasi Trump kërcënoi javën e kaluar se do të padiste gazetën për raportimet e saj mbi një porosi dhe vizatim gjoja seksualisht sugjestiv që ai i kishte dhënë Jeffrey Epsteinit. Trump ka pranuar se ka ndarë udhët me Epsteinin para se rastet e tij të bëheshin publike në 2006, ndërsa Epstein vdiq në 2019 në një qeli burgu në Nju-Jork.

Përmes platformës së tij Truth Social, Trump deklaroi: “Sot kam nderin e madh të paraqes padinë 15-miliardë dollarëshe për shpifje kundër The New York Times.” Ai akuzoi gazetën se ka gënjyer për të, për familjen e tij, bizneset e tij dhe për lëvizjet e udhëhequra nga republikanët, si America First Movement dhe Make America Great Again (MAGA).

Ky është një nga disa aksionet ligjore të Trump kundër mediave. Më herët këtë vit, ai paditi The Wall Street Journal dhe botuesit e saj për raportimin mbi një urim ditëlindjeje për Epsteinin në 2003, duke kërkuar 10 miliardë dollarë dëmshpërblim. Në korrik, kompania amë e CBS, Paramount, u pajtua për zgjidhjen e një kontesti gjyqësor pas një padie nga Trump lidhur me programin “60 Minutes”.