Trump: Përparim i madh në çështjen e Ukrainës pas takimit Putin–Witkoff

Presidenti i Shteteve të Bashkuara, Donald Trump, ka deklaruar se është arritur “përparim i madh” në çështjen e Ukrainës pas bisedimeve midis të dërguarit të tij, Steve Witkoff, dhe presidentit rus, Vladimir Putin. Në një postim në platformën e tij Truth Social, Trump e cilësoi takimin si “shumë produktiv” dhe tha se është optimist për zhvillimet që mund të pasojnë.

Takimi, i zhvilluar në Moskë, vjen vetëm pak ditë para afatit të caktuar nga Trump për të arritur një marrëveshje për armëpushim në Ukrainë – një përpjekje që presidenti amerikan e ka bërë prioritet që prej fillimit të mandatit të tij të dytë.

Nga ana tjetër, Kremlini dha një reagim të kujdesshëm. Ndihmësi për politikën e jashtme i Putinit, Yuri Ushakov, deklaroi se bisedimet ishin “konstruktive” dhe se palët shkëmbyen “sinjale”, duke lënë të kuptohet se një kanal komunikimi i rëndësishëm është hapur mes dy vendeve. Ushakov shtoi se është diskutuar mundësia e një “bashkëpunimi strategjik”, por refuzoi të japë detaje derisa Witkoff të raportojë zyrtarisht tek Trump.

Pas takimit, Presidenti amerikan njoftoi se kishte informuar edhe disa nga aleatët kryesorë evropianë të SHBA-së. “Të gjithë janë dakord se kjo luftë duhet të përfundojë dhe ne do të punojmë drejt kësaj në ditët dhe javët në vijim,” deklaroi ai.

Pavarësisht tonit pozitiv të deklaratës, Trump ka shprehur publikisht pakënaqësinë për mungesën e përparimit konkret në negociatat mes Moskës dhe Kievit, duke e bërë të qartë se SHBA pret lëvizje të prekshme përpara në këtë drejtim.

LEXONI GJITHASHTU:

• Një vendim për sanksione të reja ndaj Rusisë? Rubio: Rezultatet mund të shpallen sot
• Izraeli përgjon palestinezët me ndihmën e Microsoft