Aksionet amerikane dhe dollari ranë ndjeshëm të hënën pasi Presidenti Donald Trump intensifikoi kritikat e tij ndaj kryetarit të Rezervës Federale, Jerome Powell, duke e cilësuar atë si “një humbës i madh” për mosveprimin në kohë në uljen e normave të interesit.

Në një postim në rrjetet sociale, Trump i bëri thirrje Powell-it të ulë normat “parandaluese”, duke e akuzuar se ka qenë tepër i ngadalshëm për t’iu përgjigjur zhvillimeve ekonomike. “Mund të ketë një ngadalësim të ekonomisë nëse zoti Too Late, një humbës i madh, ul normat e interesit, TANI,” shkroi Trump.

Këto deklarata vijnë në një moment kur tregjet financiare janë tronditur nga shqetësimet për një recesion të mundshëm, të nxitura edhe nga planet e administratës Trump për vendosjen e tarifave të reja tregtare.

Tregjet reaguan menjëherë ndaj retorikës së presidentit. Indeksi S&P 500 ra me 2.4%, ndërsa Dow Jones Industrial Average humbi 2.5%. Nasdaq shënoi një rënie prej më shumë se 2.5%. Që nga fillimi i vitit, këta indekse kanë humbur nga 10 deri në 18 për qind të vlerës së tyre.

Edhe dollari amerikan pësoi goditje, me indeksin që mat forcën e tij ndaj një grupi monedhash të huaja, duke rënë në nivelin më të ulët që nga viti 2022. Ndërkohë, normat e interesit për bonot e thesarit u rritën, ndërsa investitorët kërkuan kthime më të larta për të përballuar pasiguritë në treg.

Kritikat e Trump ndaj Powell nuk janë të reja – presidenti kishte shprehur pakënaqësi edhe gjatë mandatit të tij të parë, kur sipas disa raportimeve, kishte diskutuar madje edhe shkarkimin e tij. Që nga rizgjedhja, Trump i ka shtuar presionin Fed-it për të ulur normat e interesit dhe për të ndihmuar në stimulimin e ekonomisë.

Jerome Powell, nga ana e tij, ka paralajmëruar se tarifat e reja të propozuara nga administrata Trump pritet të rrisin çmimet dhe të ngadalësojnë rritjen ekonomike në vend.