Tryeza e përbashkët, Berisha falenderon Bardhin: Mesazhi i duhur për demokratët

Është mbajtur këtë të martë tryeza e përbashkët mes deputetëve të PD-së, mbështetës të grupimeve të Sali Berishës dhe Gazmend Bardhit.

Në fjalën e tij ish-kryeministri Sali Berisha falenderoi Bardhin për mbajtjen e takimit dhe tha se të gjithë në atë tryezë ulen si të mandatuar nga votuesit demokratë.

Berisha theksoi se opozita e ka të nevojshme unifikimin e aksionit kundër qeverisë dhe tryeza e bashkëpunimit është mesazhi i duhur që i jepet votuesve demokratë.

“Së pari, dua të falënderoj përzemërsisht zotin Bardhi dhe të gjithë ata të cilët mendoj se në një moment shumë të rëndësishëm të jetës politike, u angazhuan për thirrjen dhe mbajtjen e këtij takimi të shumëpritur nga populli i përçmuar opozitar.

Tu falënderoj të gjithë ju që jeni sot këtu dhe shpreh bindjen se, në kushtet në të cilat ndodhet Shqipëria, misioni i opozitës shqiptare është më i vështiri që ai ka pasur në 32 vite, por njëkohësisht ështe edhe më vendimtari.

Ne ulemi këtu me mandat deputeti dhe jemi kaq dhe të tjerë që nuk janë këtu, por në fund të fundit, nuk duhet të harrojmë kurrë se mandat tona janë marrë në një terren në të cilin qeveria ka diktuar më të gjitha mënyrat, vullnetin e qytetarëve shqiptarë. Ka krijuar një reaksion fatal në të cilin krimi shndërrohet në vota dhe vota në krim.

Ky reaksion është shndërruar në një faktor pothuajse përcaktues të spastrimit etnik të Shqipërisë sa kurrë ndonjëherë në historinë e saj. Nga ky rreth vicioz nuk ka asnjë mekanizëm tjetër dalje përveç se përgjegjësive të opozitës.

Në rast se e sheh dhe analizon këtë rreth vicioz padiskutim që ka vend për fatalitet, por opozita nuk është ajo që mund të pranojë kurrë të bjerë në fatalitet, por është ajo që ka detyrën, ka misionin ligjor dhe moral të japë zgjidhje, të krijojë shpresën dhe të ngjallë shpresën. Dhe unë mendoj se ky takim i ynë sot është mesazhi më i duhur që ne u dërgojmë mbi 600 mijë qytetarëve që në kushtet më të pabarabarta në 32 vite, qëndruan si idealist dhe votuan opozitën në farsën elektorale të 14 majit”, tha Berisha.

LEXONI GJITHASHTU:

• Grupi Bardhi, agjendë të përbashkët parlamentare me grupin Berisha
• Nga Tabaku te Gjekmarkaj e Sula, kush janë 43 deputetët në tryezën Bardhi-Berisha