Turistë ka, por s’ka punëtorë/ Bizneset në Gjirokastër në kërkim të stafit

Gjirokastra vizitohet gjithnjë e më shumë nga turistët. Numri i tyre për këtë vit kapi shifrën e 30 mijë vizitorëve.

Por operatorët turistikë, të cilët kërkojnë të ofrojnë një shërbim gjithë e më të mirë, mbetet problem sigurimi i fuqisë punëtore, edhe pse pagat janë rritur në krahasim me vitet e kaluara.

“Fluksi i turistëve nga të gjitha anët e botës në Gjirokastër sa vete dhe shtohet  dhe nevoja për fuqi punëtore sidomos për kamerierë. Gjithashtu, edhe për kuzhinier është shumë e nevojshme sepse ka mungesa tek të rinjtë të cilët janë larguar në emigracion. Është problem sepse nuk ka edhe njerëz të aftë për të shërbyer në sektorin e turizmit në  Gjirokastër”, thotë Dëfrim Gjoçaj, kuzhinier i kulinarisë tradicionale.

“Me rritjen e fluksit turistik tani në qytet ne e shikojmë të domosdoshme dhe është e theksuar mungesa e të rinjve për t’u punësuar, për t’i futur në punë, qoftë në lokale, qoftë në hoteleri por edhe në pjesën e artizanatit, që për Gjirokastrën është shumë e rëndësishme”, shprehet Viktor Nurçe, drugdhendës.

Ndërsa pranojnë problematikën e mungesës së fuqisë punëtore, përfaqësuesit e Dhomës së Tregtisë në Gjirokastër apelojnë që të rinjtë të punësohen në këto lloj biznesesh si dhe të bëhen pjesë e trajnimeve profesionale për bizneset turistike.

“Mundësitë janë të arta për punësimet në sektorin e turizmit. Ka mungesë në çdo lloj pozicioni. Ata që punojnë sot janë të mirëpaguar dhe ata që do të duan t’i bashkohen kësaj gjëje do të paguhen shumë mirë.  Jemi të hapur me shumë organizma për trajnime, për pozicionet e punës që ata do të marrin dhe në bashkëpunim edhe me Universitetin e Gjirokastrës, në bashkëpunim edhe me organizata të tjera jo qeveritare  për trajnimin e këtyre  njerëzve”, thotë Maksim Hoxha, kryetar i Dhomës së Tregtisë.

Në Gjirokastër numërohen rreth 250 biznese në sektorin e turizmit si bujtina, hotele, lokale shërbimi, restorante etj. Gjatë sezonit turistik ato kthehen në një mundësi të mirë për çeljen e vendeve të reja të punës dhe sigurimin e të ardhurave ekonomike për banorët.

LEXONI GJITHASHTU:

• ‘‘Stolitë tona’ në Gjirokastër, aktivitete në Parkun Arkeologjik të Antigonesë
• Dita Ndërkombëtare e Muzeve, turistët vizitojnë muzeumet e hapura në Gjirokastër