Suveniret dhe punimet karakteristike të realizuara plot mjeshtëri nga artizanët në Gjirokastër janë “trendi” i këtij sezoni festash. Banorët preferojnë të zbukurojnë mjediset familjare me punimet tradicionale në drugdhendje apo qëndisje. Suveniret karakteristike përzgjidhen edhe nga turistët si kujtim i udhëtimit në qytetin e gurtë në këto ditë të festave të fundvitit.

“Ka qenë një fluks nga familjarë të ndryshëm duke i bërë suvenire dhurata njëri-tjetrit dhe kemi patur një kërkesë të shtuar në këtë pjesë duke bërë disa suvenire të vogla si bredha, yje”, Viktor Nurçe, mjeshtër drugdhendës.

“Është shtuar numri i porosive të dhuratave simbolike të personalizuara, qoftë me shishet e verës ose me produkte vendase, që të jetë një suvenir i veçantë, ndryshe nga të tjerët.”

“Vizitorët që vijnë, sidomos vendasit që janë në trevat e huaja dhe vijnë, janë të interesuar. Marrin suvenire, por janë të interesuar edhe për kostume popullore. Ju pëlqejnë kostumet për fëmijë, për të mëdhenj, por edhe për qëndisma të ndryshme që i shpien dhurata për festat tani jashtë shtetit”,- Vjollca Mezini, mjeshtre qëndistare.

Përgjatë këtij viti, qendrat e artizanatit në Gjirokastër kanë tërhequr interesimin e vizitorëve, veçanërisht të huaj, duke shërbyer për nxitjen e turizmit.

LEXONI GJITHASHTU:

• Lulja e Krishtlindjes kultivohet në Gjirokastër prej vitit 1800
• ​BE: Procesi zgjedhor në Kosovë të jetë transparent, i besueshëm dhe pa ndërhyrje