“Turp”- Beleri mbërrin në selinë e Kuvendit, qytetarët i “presin” rrugën

Delegacioni i Bashkimit Evropian ka mbërritur në Tiranë për mbajtjen e takimit të 18-të të Komitetit të Stabilizim-Asociimit BE-Shqipëri. Pjesë e delegacionit është dhe eurodeputeti grek, nga Partia e kryeministrit Mitsotakis, Fredi Beleri.

Pas takimit me kryeministrin Rama, delegecioni i BE u drejtua për në selinë e Kuvendit ku do të mbahen takime me 4 grupet parlamentare përfshirë Aleancën për Ndryshim, Partinë Socialiste, Partinë Demokratike dhe Grupin për Demokraci dhe Integrim. Këto takime do të fokusohen në dialogun politik, për të nxitur përparimin e përbashkët në procesin e integrimit dhe për të garantuar një qasje gjithëpërfshirëse që përfaqëson zërat e të gjitha partive politike.

Euronews Albania ka siguruar pamjet kur Beleri i drejtohet selisë së Kuvendit, por që refuzon të bëjë komente politike për situatën në Shqipëri, apo për takimin me kryeministrin Rama.

Disa qytetarë shihet t’i dalin para eurodeputetit dhe t’i drejtohen me fjalët “turp”, dhe “rrugaç”.

Në orët e pasdites, delegacioni i BE do të marrë pjesë në një drekë pune me ambasadorët e vendeve anëtare të BE-së në Shqipëri, duke shkëmbyer pikëpamje mbi prioritetet strategjike të rajonit dhe përparimin e Shqipërisë drejt Bashkimit Evropian.

Më vonë, delegacioni do të zhvillojë një takim me Kryetaren e Kuvendit të Shqipërisë, Elisa Spiropali.

Dita do të mbyllet me sesionin e hapjes së takimit të 18-të të Komitetit të Stabilizim-Asociimit BE-Shqipëri (SAPC), i cili do të kryesohet nga z. Marco Tarquinio, Kryetar i Delegacionit të Parlamentit Evropian.