Turqia dhe Hamasi në tryezën e bisedimeve në Ankara për fazën e dytë të marrëveshjes së armëpushimit në Gaza

Ministri i Jashtëm turk, Hakan Fidan ka zhvilluar këtë të mërkurë një takim me zyrtarë të Hamasit në Ankara. Gjatë takimit ata diskutuan marrëveshjen e armëpushimit në Rripin e Gazës dhe avancimin e marrëveshjes në fazën e saj të dytë.

Ministria e Jashtme turke theksoi se zyrtarët e Hamasit i thanë Fidan se kishin përmbushur kërkesat e tyre sipas marrëveshjes së armëpushimit, por sipas tyre pala tjetër synon të parandalojë kalimin e marrëveshjes në fazën e saj të ardhshme.

Anëtarët e Hamasit theksuan gjithashtu se ndihma humanitare që hyn në Rripin e Gazës nuk është e mjaftueshme dhe se nevojiten mallra të tilla si ilaçe, pajisje strehimi dhe karburant.

Pak ditë më parë, Fidan deklaroi se pret që presidenti i SHBA-së, Donald Trump të shpallë në javët e para të vitit 2026 fillimin e fazës së dytë të marrëveshjes së armëpushimit në Rripin e Gazës.

Delegacione nga Shtetet e Bashkuara, Egjipti, Katari dhe Turqia u takuan gjatë fundjavës në Miami të Floridës, për të shqyrtuar hapat e mëtejshëm në planin e paqes midis Izraelit dhe Hamasit.

Faza e dytë parashikon çarmatimin e Hamasit, tërheqjen graduale të ushtrisë izraelite nga enklava, formimin e një autoriteti qeverisës kalimtar dhe vendosjen e një force ndërkombëtare.