Turqia hakmerret ndaj kurdëve Erdogan-BE: Nëse na lini jashtë, mos na kërkoni asgjë

Turqia kreu mbrëmjen e së dielës një seri sulmesh ajrore ndaj zonave të Kurdistanit, në veri të Irakut, me Ankaranë që konfirmoi se kishte goditur 20 objektiva të përdorur nga militantët kurdë.

Ndërkohë, presidenti Recep Tayyip Erdogan, në seancën e parë të Parlamentit të ri, foli për çështjet kyçe të presidencës së tij, përfshirë anëtarësimin në BE dhe sigurinë kufitare.

“Si Turqi, ne nuk kemi pritshmëri nga BE-ja, tek dera e të cilit kemi pritur për 60 vjet. Nëse ata zhbëjnë padrejtësitë e tyre, sidomos atë me vendosjen e vizave, të cilat i përdorin si sanksion kundër nesh, atëherë do të korrigjojnë gabimet e tyre. Nëse jo, nuk duhet të presin asgjë prej nesh”, tha Erdogan.

Më herët gjatë së dielës, një atentator vetëvrasës aktivizoi një pajisje shpërthyese në zemër të kryeqytetit turk, ndërsa një agresor i dytë u vra në një shkëmbim zjarri me policinë.

Sulmi ndodhi disa orë përpara se Parlamenti të mblidhej. Dy oficerë policie mbetën të plagosur lehtë nga shpërthimi që ndodhi në një nga hyrjet e Ministrisë së Punëve të Brendshme, deklaroi ministri Ali Jerlikaja në platformën sociale “X”.

LEXONI GJITHASHTU:

• Erdogan: Nuk pajtohem me “qasjen negative” të liderëve tjerë ndaj Putinit
• “Paqe” mes Erdogan dhe Mitsotakis, takim “kokë më kokë” larg kamerave në OKB