Turqia i dhuron Shqipërisë një avion qeveritar me vlerën 11.9 milionë dollarë

Turqia do t’i dhurojë Shqipërisë një avion qeveritar, njoftojnë mediat turke, një hap që shihet si forcim i bashkëpunimit ndërmjet dy vendeve.

Kompania ajrore kombëtare turke, Turkish Airlines, do t’i japë qeverisë shqiptare një Airbus të përshtatur për përdorim qeveritar, me vlerë rreth 11.9 milionë dollarë. Sipas mediave turke, vendimi është konfirmuar zyrtarisht nga autoritetet turke, dhe transferimi i pronësisë do të realizohet përmes një marrëveshjeje dypalëshe granti.

Avioni është i përshtatshëm për transportin e delegacioneve qeveritare dhe përbën një gjest simbolik të mbështetjes së Turqisë ndaj Shqipërisë, si dhe një shenjë të angazhimit për forcimin e partneritetit në fushën e aviacionit civil.

Gazeta Turkiye Today raporton se avioni, i regjistruar me kodin TC-GVC, serial 1002, i prodhuar në shkurt të vitit 2000, është funksional dhe i certifikuar për operacione fluturimi.