Turqia vlerëson aktet e Egjiptit e SHBA për armëpushim, ja kërkesa dhe ndaj Izraelit

Ministria e Jashtme e Turqisë vlerësoi të premten Egjiptin, Katarin dhe SHBA-në për përpjekjet e tyre ndërmjetësuese në sigurimin e një armëpushimi të qëndrueshëm në Gaza, duke i kërkuar Izraelit t’i përgjigjet pozitivisht angazhimit të palestinezëve për paqen.

Në një deklaratë, ministria shprehu mbështetjen për nismat diplomatike për t’i dhënë fund konfliktit në Rripin e Gazës, i cili ka qenë nën bombardimet e shumta izraelite që nga 7 tetori i vitit të kaluar, duke vrarë afro 40,000 palestinezë dhe duke plagosur mbi 91,000 të tjerë.

“Ne përgëzojmë përpjekjet ndërmjetësuese të Egjiptit, Katarit dhe Shteteve të Bashkuara të Amerikës për të arritur një armëpushim të qëndrueshëm në Gaza”, thuhet në deklaratë.

Ai theksoi planin trefazor të përshkruar në Rezolutën 2735 të Këshillit të Sigurimit të OKB-së, duke e përshkruar atë si një bazë të fortë për paqen.

“Ne mbështesim zbatimin e pikave të bëra nga liderët e këtyre vendeve në deklaratën e sotme”, thuhet në deklaratë.

Ministria i kërkoi Izraelit të përgjigjet me qasjen konstruktive të palestinezëve dhe i bëri thirrje komunitetit ndërkombëtar të ushtrojë presion ndaj qeverisë izraelite për t’u pajtuar.

Të enjten në mbrëmje, ndërmjetësuesit nga Egjipti, Katari dhe SHBA i kërkuan Izraelit dhe grupit palestinez Hamas të rifillojnë bisedimet në Doha ose Kajro javën e ardhshme.