U arrestua për vjedhje, ndërron jetë në burg 20-vjeçari shqiptar

Një i burgosur italo-shqiptar 20-vjeçar është vetëvrarë në burgun Torre del Gallo në zonën e Pavias në Itali.  Lajmi është bërë publik këtë të premte nga gazeta “La Provincia Pavese” .

Ngjarja u zhvillua mbrëmjen e së mërkurës 28 dhjetor në një repart të ri të burgut të Pavias. I riu, i ndaluar për krime kundër pronës, ka mbetur i vetëm në qeli pasi dy shoqëruesit e tij kishin marrë leje.

20-vjeçari shqiptar u vetëvar me çarçafin e shtratit ku flinte. Kur një oficer i burgut e pa atë të shtrirë në dyshemenë e qelisë, ai ngriti menjëherë alarmin. Fillimisht në vendngjarje ka ndërhyrë mjeku i burgut dhe më pas efektivët, të cilët i dhanë ndihmën e parë, e intubuan dhe e transportuan me urgjencë në urgjencën e Poliklinikës San Matteo në Pavia. Por, me gjithë përpjekjet e mjekëve, i riu shqiptar nuk mundi dot të mbijetonte.

Kjo është vetëvrasja e gjashtë e regjistruar, gjatë vitit 2022, në institucionet e vuajtjes së dënimit në rajonin e Lombardisë. Një tragjedi e ngjashme ndodhi nëntorin e kaluar në Busto Arsizio.

LEXO GJITHASHTU:

• Arrestohet i dyshuari i tretë për vrasjen e futbollistit në Angli
• 97-vjeçarja dënohet për vrasjen e mbi 10 mijë personave, bashkëpunoi me nazistët