U ekzekutua me 5 plumba pranë banesës, detaje nga atentati ndaj të riut në Shkodër

Detaje të reja kanë dalë në dritë në lidhje me atentatin e ndodhur mbrëmjen e së dielës në Shkodër, ku mbeti i vrarë 19-vjeçari Erjon Xhenje.

Gazetari i “Euronews Albania”, Teodor Gjerga raporton se në trupin e viktimës janë gjendur 5 plumba dhe vrasja ndodhi rreth 500 metra pranë banesës së tij.

Xhenje ndodhej në brendësi të një lokali në lagjen “Kiras” në nën shoqërinë e disa personave, ku më pas disa persona të paidentifikuar, janë afruar me motoçikletë dhe kanë qëlluar me breshëri në drejtim të të riut.

Dyshohet se autorët janë dy, të cilët pas vrasjes janë larguar drejt lagjes “Guerrile”, ku dyshohet që të kenë djegur motoçikletën, në afërsi të cilës është gjendur edhe arma që dyshihet se është përdorur për ekzekutimin e Xhenjes.

Gjatë komunikimit të shkurtër me efektivë të policisë, i ati i viktimës tha se djali i tij nuk ka pasur konflikte, por se mund t’i ndodhte diçka prej kusherinjve të tij.

Rreth dy vite më parë, Asar Xhenja, kushëri i viktimës është akuzuar për një atentat të mbetur në tentativë. Kjo mund të jetë një nga pistat e hetimit.

Shërbimet e Policisë Vendore dhe FNSH Shkodër vijojnë kontrollin e zonës për të bërë të mundur kapjen e autorëve.

LEXONI GJITHASHTU

• Shërbente te ferma e Asmer Bilalit, përplasja e bandave solli vrasjen e 19-vjeçarit
• Atentati në Shkodër, pista kryesore përplasja mes bandave
• ‘Hajde në shtëpi, po errësohet’, çfarë i tha babai të birit para vrasjes