U kap me armë zjarri dhe tritol, Urim Meta: Kisha nevojë për para, do shiteshin në Maqedoninë e Veriut

Urim Meta i cili u arrestua një ditë më parë nga policia për trafik armësh ka pranuar akuzat që në momentin e arrestimit. Para hetuesve ka deklaruar se armët do të shiteshin në Maqedoninë e Veriut.

Gjatë dëshmisë së tij, Meta ka thënë se porosinë e ka marrë nga ndërmjetës dhe nuk e di se kush është personi që do i merrte në Maqedoninë e Veriut.

“Do i çoja deri atje, paradhënie mora 400 euro dhe pjesën tjetër pasi të dorëzoja armët dhe municionet”, është shprehur 46-vjeçari.

Ai ka thënë që është përfshirë në trafik armësh pasi kishte nevojë për para. Kallëpët e tritolit do të shiteshin me nga 500 euro copa.

Arrestimi i tij u arrit pas një ndjekje në fshatin Shëngjergj ku policia ndau edhe pamje nga operacioni. Policia sekuestroi 4 kallëpë tritoli, 2 armë zjarri dhe 1500 fishekë.