U kap në anijen me 1 mld euro kokainë, gjykata italiane jep dënimin për shqiptarin

Gjykata e Palermos ka dhënë dënimet për operacionin më të madh antidrogë të regjistruar ndonjëherë në Mesdhe, ku në Porto Empedocle, në Itali, u sekuestruan në vitin 2023, 5 tonë kokainë me vlerë rreth 1 miliardë euro.

Gjyqtari Marco Gaeta dënoi kapitenin rus të anijes Plutus, Viktor Dyachenko, dhe Vincenzo Catalano, komandantin e anijes së peshkimit Ferdinando D’Aragona, me nga 16 vjet burg secili. Tre anëtarë të ekuipazhit gjithashtu u dënuan: tuniziani Kamel Thamlaoui u dënua me 14 vjet burg, ndërsa shqiptari Elvis Lleshaj dhe tuniziani Samj Mejri u dënuan secili me 12 vjet.

Gjykata vendosi gjithashtu gjoba prej 100 mijë euro për dy komandantët dhe nga 80 mijë euro për anëtarët e ekuipazhit. Pas përfundimit të dënimit, kapiteni dhe ekuipazhi do të dëbohen nga Italia.

Kapja e drogës u bë e mundur nga ndërhyrja e Njësisë së Policisë Ekonomiko-Financiare të Palermos. Autoritetet bllokuan kokainën në momentin që po transferohej nga anija Plutus, me flamurin e Palau-s, në peshkarenën Ferdinando D’Aragona. Ngarkesa e drogës kishte udhëtuar nga Amerika Qendrore, ku nga Santo Domingo, përmes porteve të Trinidad dhe Tobago, Las Palmas në Spanjë, kishte arritur në Ngushticën e Siçilisë.

Droga u sekuestrua teksa anija po përpiqej të vazhdonte rrugën drejt Turqisë.

LEXONI GJITHASHTU:

• Pamjet brenda gjyqit, dalin para GJKKO të arrestuarit për laboratorët e kokainës
• Në Ekuador i vdekur, në RMV gjallë: Kush është Remzi Azemi, bosi shqiptar i kokainës