U shemb përtokë në ndeshjen kundër Interit, si shfaqet gjendja e futbollistit

Edoardo Bove e ka kaluar rrezikun, tashmë gjendja e tij paraqitet e stabilizuar, ndërsa vijon të jetë nën trajtim mjekësor.

Mesfushori i Fiorentinës u shemb në tokë në përballjen me Interin, duke humbur vetëdijen, por tani duket se gjithçka ka kaluar dhe futbollisti ka dalë nga intubimi, bën të ditur ekipi vjollë.

Në përballjen ndaj Interit, 22-vjeçari shfaqi shqetësime, me ndeshjen që u ndërpre në minutën e 16’ për të mos rifilluar më.

Mjekët raportojnë se pas ekzaminimeve të kryera nuk raportohet për probleme me zemrën apo goditje në kokë, por futbollisti ka kaluar një krizë momentale. Gjendja e tij është përmirësuar, por sërish do të duhet që për disa ditë të jetë nën survejimin e mjekëve.

Përballja mes Fiorentinës dhe Interit u ndal pikërisht pas këtij episodi, teksa pritet të luhet në ditët në vijim. Lajmi i mirë është se futbollisti e kaloi rrezikun për jetën. Menjëherë pas ngjarjes drejtuesit e klubit, lojtarët dhe politikanë lokalë shkuan në spital për t’i qëndruar pranë Bove.

LEXONI GJITHASHTU:

• Goli i anulluar dhe penallti e humbur, çfarë ndodhi në derbin Tirana-Partizani
• Ernest Gjoka trajneri i ri i Skënderbeut