U vendosnin logo të markave të shtrenjta rrobave nga Turqia, procedohen babë e bir

Një 59-vjeçar, së bashku me djalin e tij, janë proceduar penalisht nga Policia e Tiranës, pasi kontrabandonin nga Turqia, veshje të ndryshme, të cilave u stamponin logo false të markave të njohura për t’i shitur me çmime shumë të larta.

Gjatë kontrolleve në banesën dhe mgazinën e tyre në lagjen “5 Maji” policia sekuestroi në cilësinë e provës rreth 1000 konfeksione të ndryshme, logo dhe etiketa false të disa markave, si dhe një pajisje për stampimin e tyre.

Policia shpalli në kërkim djalin 29-vjeçar, ndërkohë që materialet procedurale ndaj tyre i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

“Specialistët e Sektorit për Hetimin e Krimeve Ekonomike dhe Financiare në DVP Tiranë, pas një pune të mirëfilltë hetimore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe finalizuar operacionin policor të koduar “Brands”, në kuadër të të cilit ka nisur procedimi në gjendje të lirë për shtetasin V. A., 59 vjeç, banues në Tiranë, si dhe po punohet për kapjen e djalit të tij, shtetasit D. A., 29 vjeç.

Nga veprimet hetimore ka rezultuar se këta dy shtetas magazinonin në banesën e tyre dhe në dy subjekte në rrugën “5 Maji”, mallra (veshje) të dyshuara të kontrabanduara nga Turqia, të cilave i vendosnin logo dhe etiketa të markave të njohura, me qëllim për t’i shitur me çmime shumë të larta.

Në cilësinë e provës materiale u sekuestruan rreth 1000 konfeksione të ndryshme, logo dhe etiketa false të disa markave, si dhe një pajisje për stampimin e tyre”, thuhet në njoftimin e policisë.

LEXONI GJITHASHTU:

• Sekuestrohen 9670 euro dhe 3345 paund në portin e Durrësit, procedohet 39-vjeçari
• Pse u la e lirë gruaja e Pëllumb Metës, eksperti: Vepruan si organizatë kriminale