U zhduk më 22 tetor, 35-vjeçarja shqiptare Floresha Prengu gjendet e vdekur në Trento

Floresha Prengu, 35-vjeçarja shqiptare për të cilën familja kishte raportuar zhdukjen që më 22 tetor 2025, është gjetur e pajetë të enjten rreth 40 kilometra larg shtëpisë së saj përgjatë lumit Adige. Ajo ishte nënë e dy vajzave dhe banore e Trentos në Itali.

Trupi i saj u identifikua nga familja, e cila deri në fund shpresonte se do e gjente të gjallë. Floresha, e njohur si Flora, u pa për herë të fundit në qendër të qytetit të Trentos mëngjesin e 22 tetorit, kur ishte nisur për në punë. Që atëherë, nuk kishte asnjë informacion mbi vendndodhjen e saj.

Pas zhdukjes, familja njoftoi menjëherë autoritetet dhe publikun, duke kërkuar çdo informacion për të. Policia dhe zjarrfikësit vullnetarë nisën kërkime intensive përgjatë lumit Adige, duke përdorur patrulla lumi dhe një helikopter për kontrolle ajrore, por pa rezultat. Kërkimi u zgjerua përtej kufijve të Trentinos, ndërsa lajmi u përhap edhe nga mediat shqiptare.

Programi italian për personat e zhdukur, Chi l’ha visto?, i kushtoi një puntatë të veçantë Floresha Prengu gjatë periudhës së zhdukjes së saj.

Megjithë gjetjen e trupit, mbetet ende e paqartë shkaku i zhdukjes dhe vdekjes së 35-vjeçares. Familja dhe autoritetet lokale po presin hetime të mëtejshme për të sqaruar rrethanat e ngjarjes.