Uganda mbyll kufirin me Republikën e Kongos për një muaj për të kufizuar përhapjen e Ebolës

Uganda ka mbyllur kufirin e saj me Republikën Demokratike të Kongos fqinje në përpjekje për të kufizuar përhapjen e Ebolës, tha sot qeveria e vendit.

Kufiri do të mbetet i mbyllur për katër javë, përveç ekipeve të reagimit ndaj Ebolës, operacioneve humanitare dhe të sigurisë, si dhe transportit të ushqimit dhe mallrave , tha në një konferencë për shtyp zyrtarja e lartë e shëndetësisë Diana Atwine, raporton Reuters.

Uganda ka raportuar shtatë raste të Ebolës dhe një vdekje në një shpërthim të përqendruar në provincën Ituri në Republikën Demokratike të Kongos.

Sipas Organizatës Botërore të Shëndetësisë, në Kongo janë regjistruar më shumë se 900 raste të dyshuara dhe më shumë se 220 vdekje, ndërsa shpërthimi i llojit të rrallë Bundibugyo të Ebolës është shpallur një emergjencë ndërkombëtare shëndetësore.

Qeveria e Ugandës njoftoi tashmë masat e para për të parandaluar përhapjen ndërkufitare të virusit javën e kaluar , përfshirë pezullimin e transportit publik me Kongon.

Atwine deklaroi se çdo person që lejohet të hyjë në Ugandë nga Kongo do të duhet t’i nënshtrohet vetëizolimit të detyrueshëm për 21 ditë.