Ukraina sabotoi ‘rrjedhën e veriut’, ‘WSJ’: Ushtarët shpërfillën urdhrin e Zelenskyt

Një grup shtetasish ukrainas, të maskuar si turistë në një varkë, fshihen pas sabotimit të gazsjellësit “Rrjedha e Veriut”.

Lajmin e bën të ditur gazeta amerikane “Wall Street Journal”.

Operacioni u krye gjatë një nate të muajit maj 2022, kur një grup ushtarësh ukrainas po festonin ndalimin e një sulmi rus dhe po kërkonin t’i jepnin një tjetër goditje Moskës – raporton gazeta, që citon burime në dijeni të planit.

“Rrjedha e Veriut” është një rrjet tubacionesh që kalojnë nën detin Baltik nga Rusia në Gjermani, për të furnizuar Evropën Perëndimore me gaz natyral dhe që në këmbim pajis me miliarda euro Kremlinin.

Presidenti ukrainas Volodymyr Zelensky fillimisht e aprovoi planin, por përpara se agjencia amerikane e inteligjencës, CIA, të informohej dhe t’i kërkonte atij ta ndalonte atë.

Zelensky e urdhëroi ndalimin, por komandanti i trupave të tij, Valeriy Zaluzhniy e vazhdoi operacionin – bën të ditur gazeta.

“Wall Street Journal” raporton se ka folur me 4 oficerë të lartë të ushtrisë ukrainase dhe oficerë të shërbimeve sekrete të vendit, që ose kanë marrë pjesë, ose kanë pasur dijeni direkte për aktin e sabotimit.

Të gjithë zyrtarët e konsideronin gazsjellësin si një objektiv legjitim, teksa vendi mbrohej nga sulmet ruse.

Edhe shërbimet sekrete gjermane deklaruan se dyshojnë se Ukraina ishte prapa aktit të sabotimit. Për këtë arsye, mediat lokale bënë të ditur se një prokuror ka shpërndarë një urdhër-arrest në dëm të një shtetasi ukrainas, të identifikuar me emrin Volodymyr Z, i cili dyshohet se është kthyer në Ukrainë.

LEXONI GJITHASHTU:

• Kryeministri i Bavarisë në Nord Stream 2: Mund të jetë shumë ftohtë në Gjermani
• CIA e dinte se Ukraina planifikonte të hidhte në erë gazsjellësin Nord Stream