Ukrainasit kundër Biden: Situata nuk është aq keq

Banorët e Kievit kanë reaguar në mënyra të ndryshme ndaj thirrjes së presidentit të Shteteve të Bashkuara, Joe Biden, që shtetasit amerikanë të largohen nga Ukraina.

Biden deklaroi të enjten se “gjërat mund të marrin shumë shpejt tatëpjetën” dhe se nuk do të dërgonte trupa për të shpëtuar amerikanët në rast të një sulmi nga Rusia.

Por për banorët e kryeqytetit ukrainas, deklarata të tilla janë një përpjekje për ta paraqitur situatën më të rëndë se ç’është aktualisht, me qëllim që pala amerikane të sigurojë avantazh në negociatat e ardhshme.

“Ata vetëm përhapin panik. Personalisht më duket se gjërat po kthehen në normalitet. Mendoj se po ushtrohet shumë presion për të krijuar një panoramë të gabuar të situatës, se gjithçka është keq dhe të gjithë duhet të lënë vendin. Por ne vazhdojmë jetën tonë”, thotë një student.

Megjithatë, ka edhe nga ata që thonë se gjasat për një konflikt ushtarak me Rusinë janë 50 me 50.

“Nuk më pëlqen ideja që Rusia të na pushtojë, por Putin është i paparashikueshëm, çdo gjë është e mundur”, shprehet Shvets Moryak, banor i Kievit.

Rreziku nisur nga thirrja e presidentit amerikan është minimizuar edhe nga vetë autoritetet ukrainase. Por sërish nuk janë të paktë ata që bien dakord se pozita gjeografike e Ukrainës do të bëhet gjithmonë shkas për konflikte.

LEXONI GJITHASHTU:

• Kriza Rusi-Ukrainë në momentin më të rrezikshëm, thotë Johnson
• Ukraina mes përpjekjeve diplomatike dhe gatishmërisë për luftë